ORAGONX: THE NEW BIKOL REPUBLIK

(para ki Abang)

Idtong mabaskog asin mapula-pula pa an buray
haling binuno sa handaan mas marhay,
iyong reseta kaidto kan mga gurang
na ipakakan sa aking dai nakakataram.

Kaining huring fiesta,
iba si hinungit ninda sa banwaan.
Nagkaigwang kusog bigla
an dila kan mga pula asin mga puta
garo baga an Bakal na Espiritista naghilig
asin kinahiligan sinda
ta may dara-dara pa ining
mga puting sobre may laog na nagririsik-risik pa.

Totoo mga katood, sinasabi ko saindo
Bagong Pentecostes an aldaw na idto.
Igwang nagtararam na maisog manongod
sa demokrasya, sinurog
asin nakipag-ulian sa dai ninda kaiba
inuli asin inula si saro sainda.
Sabi man kan nakasutana,
“dai baleng dayo sa lugar ta
an mahalaga may mejoras siyang dara-dara.”
Duman sa kadlagan, an mga rungaw na ido
kan procurador sibot-sibot sa pagpapasunod
kan mga kordero sa tangkal.

Tandaan, mga katood, 2007 ini
asin bakong panahon ni Kristo
alagad sinaro-an man ako
kaya dangugon nindo an dai ko tinataram.

Puede sigurong apokalipsis na
ta may aking nagtaram laban sa gurang
mantang an gurang dai nagpakagurang,
an mga magkakaiwal
nagturukaw na iribahan
sa doot nin matunok na kahadian.

Para mientras,
si tinaan kan banwaan
nin kapangyarihan kan saindang dila,
pigdidila-dilaan na sinda
mantang nagtatais kan saiyang pantabas
sa pagbalik saiya kan mga puting sobre
na iyo man talaga an may sinasabi.

Kaya ako nagtaram,
boot ko lang ipagpag an alpog
kan satong banwaan, mga katood.

(San Jose, Ca. May 15, 2007)