ORAGONX: THE NEW BIKOL REPUBLIK

IGWA KITANG FLASH REPORT HALI KI BOMBO REY. REY COME IN.

Iyo, Bombo Crisel, manongod ini sa sarong dakulaon na garo kahon na yaon ngonian sa tahaw kan Plaza Quezon. Iyo kahon, bako ining ordinaryong kahon, ta dakulaon kasing langkaw ini kan PNB, haros nasakop na kaini si bilog na Plaza. Garo ngani hinalon na kaini si enterong stage, dai mo na mahihiling. Mayong nakakaaram kun siisay o kasuarin pa ini digdi. Basta an aram ko mayo pa ini kasubanggi. Nagimata an enterong Naga na yaon na ini ngonian lang na pagkaaga. Asul ini, garo salming. Mayo pa akong mahiling na opisyal kan ciudad digdi Bombo Crisel alagad dakul na ang mga tawong nakatiripon digdi. May liwanag akong nahihiling na garo hali sa laog kaini. Nagigiromdoman mo si Rubik’s cube, garo ini Rubik’s Cube, kundi asul lang gabos an lambang mga kuwadro kaini. kadakul an mga kuadro kaining mga salming. Hapoton ta ining sarong pulis na nag-uusyoso man digdi. Sir, Sir sa Bombo Radyo ini. Sir, Sir.

Ay iyo, mayo man kaming naririsang garo maraot na dara an kahon. alagad an hapot sain ini hali? Baka dara ini nin mga taga ibang planeta alagad An naririsa ta lang ta garo an lambang tawo na maghiling sa arin man sa salming, garo natatalaka. May nahihiling sindang kanya-kanya istorya, na garo manongod sa buhay ninda.

Ay totoo po iyan, Sir, ako nahiling ko an sakong pagkamundag mismo, napahibi ako ta nahiling ko an sakong ina na nagadan pakatapos akong mamundag. pero dai ko na hiniling si ibang mga eksena kan buhay ko ta natakot na ako. totoong totoo, basta
aram ko na an gigibohon ko habo kong mangyari idto sako pagabot kan aldaw.

Ako an nahiling ko lang an kinaagahan kan Pilipinas. Grabe pang kariribokan an satong aagihan. Dai ko lang maintindihan ta si sa huring parte ipinahiling sako an naputol na rosaryo, na nagturubragan si mga boletas. Dai ko maintindihan an kahulugan kaidto.

Ako man sir, an nahiling ko an dakul na mga tawo na nakasarakay sa lantsa asin may inagihan sindang garo an dating kampanaryo kan simbahan sa MIlaor, dikit na lang an mahihiling kaini si atop na lang asin si krus.

Halat, halat, saro saro lang, boot mong sabihon, sanop nin tubig an enterong Milaor?

Pati garo ngani Naga sir, garo eksena sa Waterworld, Sir.

Ako, nahiling ko an sarong matabaon asin halangkaw na lalaki, nagmamando kan paghakot kan mga orna ni balota, sibot sibot an mga tawo na pigsasaranglian an mga nakasurat sa papel. dangan, nahiling ko na lang an garo pigaaragawan na sadit na babaing may arong, pigdadaklag siya nin gapo, sa tinampo kadakul mga tangke.

Puede sir mangapodan?

Atyan na, atyan na lang po.

Kun puede po ta nahihiling ko kaya sa kahon an kadakul na mga tawo na nagtitipon, garo nagdadangog sa mga diskurso, dai garo nagdadalan, asin bigla na lang nawara kan magwarak an nakakasulang liwanag, hali sa, ay Diyos ko hali sa dakulaon na kahon na asul….