ORAGONX: THE NEW BIKOL REPUBLIK

SA CITY ISLANDS, 2 ALDAW PAKATAPOS KAN SAKONG COMPLEANO
(para ki Gani asin Robie)

Iyo, iba man nanggad
digdi an mga aniit asin kasag
malaman, dasok sa memorya nin dagat
yaon sa tahaw nin samong pagkarayoan.
Alagad, ano daw
ta hinihidaw ko ngonian
an suka, sili asin tinadtad na bawang
minapanagom kan dara niyang
mainiton na pangudtuhan:
dinoradong patos sa dahon
nin batag na linubluban,
sararadit na mga ugama
nadakop kasuodmang aga
asin tubig sa pigingodngoran na daud.
Ay, pakatapos nin saiyang pagkarigos
an parong kan kadlom asin puga
hali sa saiyang buhok
minasuklob sa laog kan samong payag-payag
sa tahaw nin nagdidiklom na kaomahan
asin muraway na boot,
igwa pa akong natatadang kusog
nganing mag-arado bago kami magkaturog.

01-13-07, N.J.

VIAJE

Lunad nin Greyhound
haling Norfolk pasiring New York
ini an biyaheng daing gusot,
garo sarong pagturog
sa inarkilang kuartong malipot,
an kama, malumhok,
an saiyang hinangos, mahamot.

Sa saimong pagmata
garo baga dai sana,
mayong paaraman,
mayong ni ho, ni ha.

Duman sa ginikanan kong banwaan,
an pagpa-Iriga haling Manila
garo pakikipagdurog
sa babaying haralaba an kuko.
Pagpukaw saimo pagka-aga
pano-pano ka nin kamros
sa saimong abaga asin likod,
an lawas mo abaang kukulog.

Alagad sa pagsuruhayan
igwa pang pababay-babay
asin hapot asin agdang:
“promise, ha?”

- 01-14-07, N.J.

PAGHIDAW SAIMO

Afuera sa kolor asin pagnamit,
magin sa tono nin boses,
saro pa ining minapasaluib
kan sakong pagigin estranyo
sa malipot na ciudad na iniho:
ining mahibog na jacket na anit,
sarong subling termino asin terno
pansagang sa niyebe para sa sakong kublit
tood sa tropikong malanit na init.

Ay, kuta ika an sakong kabit-kabit digdi
sa paglalakaw-lakaw sa maambon na kalye!

- 01-15-07, N.J.

PAGHAHANAP KAN NIYEBE

Pauling San Jose haling New Jersey
iniisip ko kun hihidawon ko an niyebe
na iyong rason kaya ako nagdigdi
sa parteng ini kan Amerika
hali sa masaldang na California.
Dapat talaga taglipot na
alagad, abot na ako maghali
dai ko man lang ini namati.

Haros kabangang sanggatos na taon
akong nabuhay na garong palmera
sa sakong tropikong isla
mayo man garong pagkakaiba
kun dai ako makakapot nin malipot na bola nin isnow.
Alagad, sigurado ako na an mga pino
maninibago siring sa mga layas na ganso
asin pato na kasubago pagtangad ko
pa-uli na an layog haling habagat,
Ribong na soboot an panahon,
sabi kan CNN, asin tama si Al Gore.
Magin man an naghapot
kun paano matatapos
an kinaban, kun sa kalayo o sa lipot?
Dai naman sako mahalaga
kun arin sa duwa.
basta para sa sako, kun magabot ini,
dapat madali asin mayong pinipili.

01-17-07 Virginia Beach